ଭୁବନେଶ୍ୱର, ୨୪/୦୪: ଥାନା ପରିସରରେ ହଙ୍ଗାମା କରିବା ପଡ଼ିଲା ମହଙ୍ଗା । ପୋଲିସ କର୍ମଚାରୀଙ୍କ ସହ ଗଣ୍ଡଗୋଳ କରି ବନ୍ଧା ହୋଇଛନ୍ତି ୫ ଜଣ ନକଲି ମହିଳା କାଳିସି । ରାଜଧାନୀ ଉପକଣ୍ଠ ବାଲିପାଟଣା ଅଞ୍ଚଳରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ଝାମୁ ଯାତ୍ରା ଦିନ ଅଠାନ୍ତର ଗ୍ରାମରେ ପ୍ରାୟ ୮ ଜଣ ମହିଳାଙ୍କୁ କାଳିସି ଲାଗିଥିଲା । ଏହି ସମୟରେ ଜଣେ ଯୁବକଙ୍କୁ ଉଦ୍ଦେଶ୍ୟମୂଳକ ଭାବେ ମାଡ ମାରିଥିଲେ କାଳିସି । ଏ ନେଇ ଯୁବକ ଜଣକ ବାଲିପାଟଣା ଥାନାରେ ଅଭିଯୋଗ କରିଥିଲେ । ବୁଧବାର ସଂଧ୍ୟାରେ ଉଭୟ ପକ୍ଷଙ୍କୁ ବାଲିପାଟଣା ଥାନାକୁ ଡକାଇଥିଲା ପୋଲିସ । ଏହି ସମୟରେ ୫ ଜଣ ମହିଳା କାଳିସି ଥାନା ପରିସରରେ ହଙ୍ଗାମା କରିବା ସହ ପୋଲିସ କର୍ମଚାରୀଙ୍କୁ ଅଭିଶାପ ଦେଇଥିଲେ । ଯୁବକଙ୍କ ଅଭିଯୋଗ କ୍ରମେ ବାଲିପାଟଣା ପୋଲିସ ୫ ମହିଳା କାଳିସିଙ୍କୁ ଗିରଫ କରିବା ସହ ମାମଲା ରୁଜୁ କରିଛି । ଅନ୍ଧବିଶ୍ଵାସକୁ ପ୍ରସୟ ଦେବା, ନକଲି ଅଭିନୟ କରି ଆକ୍ରମଣ କରିବା ଭଳି ଦଫା ଲଗାଇଛି ପୋଲିସ ।
